Category: Artistic

Bum, bum, bum, bum… bum

Bum, bum, bum, bum… bum

Bħar-re maġi, segwiet l-istilla murtal. Tlieta lejn il-grotta, hi lejn l-irwejjaħ ta’ gallinar. B’ħarsitha ‘l fuq, waqfet quddiem ċorma għażżiena ta’ kurjużi Maltin, b’siġġijiet u banketti, b’tal-festa t-trumbetti!

Bum, bum, bum, bum… bum. Il-qalb fis-smewwiet! Xi sbuħija! Bum, bum, bum, bum… Libsa sewda u bajda. Spallejn mikxufin.

Kuluri. Ħafna kuluri jsebbħu s-smewwiet sewdiena, forsi għax imnikkta. Kuluri… kuluri bħal ta’ lanġas, għeneb u tuffieħ. Kuluri li jdawlu l-irħula, iżda jgħibu mal-iċken nefħa riħ. Kuluri li… bum, bum, bum, bum, bum…

F’għajnejha r-rifless tan-nar ifewwaħ. Fil-mowbajl ir-rikordju ta’ murtali, issa mejta, li weġġgħu ‘l widnejha. Għal wieħed, mitejn. Tpaxxew l-għajnejn. Marija! Fil-bieb tal-knisja l-folla eleganti. Marija ‘l bogħod, qalb żiffa miżgħuda bżieżaq tas-sapun. Tittajjar magħhom sa ma’… bum, bum, bum, bum, bum…

Illami l-qalb! Magħluqa, imbeżża’. Min jaf għaliex? Forsi s-smewwiet suwed jew forsi t-tifkira tad-drabi li l-qalb instabtet f’nofs għalqa niexfa; tkaxkret bħal ħanqa ta’ ħmar. Bum, bum, bum.

Siktet Marija, mietu l-kuluri. Silenzju… Rakkont ta’ qalb solitarja f’landa tal-ħawħ. Qalb priżervata, mhux daqstant friska, iżda żgur aktar protetta. Riċetta. Qalb imgeżwra f’ħajt fejn koppja anzjana tinnamra f’dawl il-kuluri. Ħajt tas-sejjieħ.

Min jaf?… Bum, bum, bum. Forsi bebbuxu jirnexxilu jneħħieh?

Id-daħk ifaqqa’ jinstema ċar lil hinn mit-teknoloġija li deffist f’widnejja. Il-mużika tixtieq twassalni fi ħsieb dwarek, bħal qabel, bħal kull lejl, iżda llum qed tfalli. Iċ-ċattra tmewweġ fuq infinità ta’ dlam, f’direzzjoni kompjuterizzata, bla kulur. Il-kulur lebbet l’hemm, ittajjar, f’forom ta’ bżieżaq, u miegħu kaxkar dari mill-irbit tagħha,‘l bogħod mill-belt. Direzzjoni; imkien.

Fuq dan l-iswed nasal nifhem lil Chardin. Hawn il-passat u l-futur ma jeżistux. Jeżisti biss issa. Imma “issa x’inhu?” jistaqsi Daverio, minn għajn ta’ Indjan. Huwa issa l-omega jew l-alfa? Huwa dan il-bidu jew it-tmiem tal-ħsieb? Tiegħi. Tiegħek.

Imdendel ma’ ħabel, infittex art għal saqajja u niġbed il-bżieżaq lejn ħolma imma ninduna li ninsab ngħum f’ilma fond; niġġieled ma’ biżgħati qalb rima dehebiena. U bħaċ-ċkejkna Paulette nipprotesta u nfakkar li “hawn mhux tagħkom!”.

Ix-xewqa tibqa’. Ix-xewqa għall-blu; mhux tal-boroż fejn nirremetti imma tas-sema kristallina. Sema li mhix biss stampa diġitali riflessa fuq il-ħġieġa li tifridni mill-immensità tal-ilma. Ix-xewqa tibqa’; li dawn il-ħsibijiet jagħmlu spazju, jirtiraw u jħalluni nimxi lejn il-ħolma li teħodni fuq xifer l-irdum, f’ġieh l-imħabba.

Once there was a girl who lived in a workshop. She felt as if…

Darba waħda kien hemm tfajla tgħix f’maħżen. Kienet tħossha bħal Santa Klaws. Santa Klaws għal tfal li llum adulti. Ix-xewqa tagħha kienet li l-ħolm f’dawk l-ittri ddawwarhom f’realtajiet li jsebbħu… iżda mhux b’maġija imma fatti: xi daħka, invenzjoni, jew xi stejjer f’ritratti.

Samsara isimha, kemmxejn baxx leħinha. Tħażżeż, tpitter jew tħit ma’ noti mużikali, tumblr u tazzi tal-inbid. Fil-ġnien tal-weraq mill-ħomor hi tfassal il-ħsieb li jfewwaħ b’riħet il-ħobż misjur. U l-ixkejjer jinġemgħu, uħud minnhom tassew tqal. U l-ħidma tibqa’ għaddejja, anki wara nofsinhar. U l-ittri ma jiqfux… skont hi dik mhix maġija.

Samsara tfajla mistħija. Fil-maħżen taħdem ġugarelli li jikxfu lilha nfisha. Quddiem mera s-sbuħija u mitt mistoqsija: fejn huma d-dmugħ, fejn hi Elena, x’realtà jmissni jiena?

Iltqajt ma’ Samsara, imma l-maħżen ma rajtux. Rajt tfajla titbandal, smajtha tidħak, imma ’l Santa Klaws ma smajtux. Rajt tfal jifirħu b’rigali li waslu miċ-ċumnija. Rajt ittri jinkitbu mija mija. Missitni xkora għax rabbejt il-għaqal. Kurjuż xrift fiha, sibt realtà ġdida; insterqitli taħbitha. Ġugarell Samsara: il-ħolma minn idha.

Fil-maħżen l-ittri ma jiqfux. Hi tibqa’ tgħid li mhix maġija.

Jien naf x’inhi l-maġija. Tirċievi xkora, f’xemx taqbad filgħaxija.

The end